ਨਸ਼ਿਆਂ ਤੇ ਵਿਜ਼ਨ ਡਾਕੂਮੈਂਟ

1. 1

   ਸਿੱਖ ਨੌਜਵਾਨੀ ਦੀ ਰੂਹੇ-ਰਵਾਂ ਹਸਤੀ ਭਾਈ ਸਾਹਿਬ ਭਾਈ ਅੰਮ੍ਰਿਤਪਾਲ ਸਿੰਘ ਵੱਲੋਂ ਪੰਜਾਬ ਵਿਚ ਬਿਤਾਏ ਕੁਝ ਕੁ ਮਹੀਨਿਆਂ ਦੌਰਾਨ ਨੌਜਵਾਨਾਂ ਨੂੰ ਅਧਿਆਤਮਕ, ਸੱਭਿਆਚਾਰਿਕ ਤੇ ਵਿਚਾਰਧਾਰਕ ਚੇਤਨਾ ਰਾਹੀਂ ਨਸ਼ਾ ਮੁਕਤ ਕਰਨ ਦਾ ਸਫਲ ਤਜਰਬਾ ਕੀਤਾ ਗਿਆ ਹੈ। ਇਸੇ ਤਜਰਬੇ ਨੂੰ ਪੰਜਾਬ ‘ਚ ਲਾਗੂ ਹੋਣ ਤੋਂ ਰੋਕਣ ਲਈ ਭਾਈ ਸਾਹਿਬ ਨੂੰ ਗ੍ਰਿਫ਼ਤਾਰ ਕਰਕੇ ਪੰਜਾਬ ਤੋਂ ਦੂਰ ਲਿਜਾਇਆ ਗਿਆ। ਉਸੇ ਤਜਰਬੇ ਨੂੰ ਦੁਬਾਰਾ ਪੰਜਾਬ ‘ਚ ਸ਼ੁਰੂ ਕੀਤਾ ਜਾਵੇਗਾ। ਮਨੋਵਿਗਿਆਨਿਕ ਵੀ ਗੁਰੂ ਸਾਹਿਬ ਦੀ ਮਨ ਜੀਤੈ, ਜਗ ਜੀਤ ਦੀ ਅਗਵਾਈ ਨੂੰ ਕਬੂਲ ਕਰਦੇ ਹਨ ਤੇ ਜਿਸ ਨੌਜਵਾਨ ਦਾ ਮਨ ਬਦਲ ਜਾਵੇ ਉਸਦਾ ਸਰੀਰ ਨਸ਼ਿਆਂ ਤੋਂ ਯਕਦਮ ਛੁਟਕਾਰਾ ਪਾ ਲੈਂਦਾ ਹੈ।

2. 2

   ਆਮ ਆਦਮੀ ਪਾਰਟੀ ਸਰਕਾਰ ਦੌਰਾਨ ਨਸ਼ੇ ਰੋਕਣ ਲਈ ਪੰਜਾਬ ‘ਚ ਪਿੰਡ ਪੱਧਰ ‘ਤੇ ਆਪ ਮੁਹਾਰੇ ਕਮੇਟੀਆਂ ਬਣੀਆਂ ਸਨ। ਪੁਲਿਸ ਤੇ ਸਰਕਾਰ ਨੇ ਇੰਨਾਂ ਕਮੇਟੀਆਂ ਨੂੰ ਨਹੀਂ ਚੱਲਣ ਦਿੱਤਾ। ਨਸ਼ਾ ਰੋਕਣ ਦੇ ਮਸਲੇ ‘ਚ ਪਿੰਡਾਂ ਨੂੰ ਖੁਦਮੁਖਤਿਆਰੀ ਦਿੱਤੀ ਜਾਵੇਗੀ। ਇੰਨਾਂ ਕਮੇਟੀਆਂ ‘ਚ ਬੀਬੀਆਂ ਦੀ ਸ਼ਮੂਲੀਅਤ ਹੀ ਨਹੀਂ ਹੋਵੇਗੀ। ਸਗੋਂ ਇਹ ਜਰੂਰੀ ਹੋਵੇਗਾ ਕਿ ਕਮੇਟੀ ਦੀ ਮੁੱਖੀ ਬੀਬੀ ਹੀ ਹੋਵੇ। ਦੁਬਾਰਾ ਕਮੇਟੀਆਂ ਬਣਾਈਆਂ ਜਾਣਗੀਆਂ। ਜਿੰਨਾਂ ਵਿੱਚ ਪਾਰਟੀ ਪੱਧਰ ਤੋਂ ਉੱਠ ਕੇ ਮੋਹਤਬਾਰਾਂ, ਆਮ ਬਾਸ਼ਿੰਦਿਆਂ, ਕਿਸਾਨ ਤੇ ਮਜ਼ਦੂਰ ਯੂਨੀਅਨਾਂ ਦੀ ਸ਼ਮੂਲੀਅਤ ਹੋਵੇਗੀ। ਇਹਨਾਂ ਕਮੇਟੀਆਂ ਨੂੰ ਕਾਨੂੰਨੀ ਪਾਵਰਾਂ ਦੇ ਕੇ ਇਨ੍ਹਾਂ ਦੀ ਕਾਰਵਾਈ ਨੂੰ ਅਸਰਦਾਰ ਬਣਾਇਆ ਜਾਵੇਗਾ।

3. 3

   ਪੁਲਿਸ ਨਸ਼ੇ ਰੋਕਣ ਵਿੱਚ ਫੇਲ ਹੋ ਚੁੱਕੀ ਹੈ। ਇਸ ਕਰਕੇ ਇਕ ਨਵੀਂ ਫੋਰਸ ਬਣਾਈ ਜਾਵੇਗੀ। ਜਿਸ ਵਿਚ ਅਧਿਕਾਰੀ ਨਸ਼ਾ ਸਮੱਗਲਰਾਂ ਅਤੇ ਨਸ਼ੇ ਦੇ ਸ਼ਿਕਾਰ ਨੌਜਵਾਨਾਂ ਬਾਰੇ ਵਿਸ਼ੇਸ਼ ਤੌਰ ਤੇ ਟਰੇਂਡ ਕੀਤੇ ਹੋਣਗੇ। ਉਹ ਫੋਰਸ ਪੁਲਿਸ ਦਾ ਹਿੱਸਾ ਨਹੀਂ ਹੋਵੇਗੀ, ਸਗੋਂ ਪੁਲਿਸ ਅਤੇ ਹੋਰ ਫੋਰਸਾਂ ਉਤੇ ਵੀ ਨਿਗਰਾਨੀ ਰੱਖੇਗੀ। ਇਸ ਤਰਾਂ ਨਾਲ ਪੁਲਿਸ ਦਾ ਭਾਰ ਵੀ ਘਟੇਗਾ ਤੇ ਪੁਲਿਸ ਆਮ ਲੋਕਾਂ ਦੇ ਕੰਮ ਬਿਹਤਰ ਢੰਗ ਨਾਲ ਕਰ ਸਕੇਗੀ। ਇਹ ਫੋਰਸ ਸਿੱਧੀ ਮੁੱਖ ਮੰਤਰੀ ਨੂੰ ਰਿਪੋਰਟ ਕਰੇਗੀ।

4. 4

   ਇਕ ਨਸ਼ੇ ਦੇ ਬਦਲ ਵਜੋਂ ਦੂਜੇ ਨਸ਼ੇ ਦਾ ਤਰੀਕਾ ਵੀ ਕਾਰਗਰ ਸਾਬਤ ਨਹੀਂ ਹੋ ਰਿਹਾ। ਪੰਜਾਬ ਦੀ ਕਾਇਆ ਕਲਪ ਕਰਨ ਲਈ ਪ੍ਰਾਪਤ ਨਸ਼ਿਆਂ ਬਾਰੇ ਖੋਜ ਅਤੇ ਰਿਸਰਚ ਕਰਵਾਈ ਜਾਵੇਗੀ ਤਾਂ ਕਿ ਇਨ੍ਹਾਂ ਮਾਰੂ ਨਸ਼ਿਆਂ ਦਾ ਢੁਕਵਾਂ ਹੱਲ ਲੱਭਿਆ ਜਾ ਸਕੇ। ਇਸ ਤਰੀਕੇ ਨਾਲ ਵੱਖ ਵੱਖ ਪੱਧਰ ‘ਤੇ ਨਸ਼ਿਆਂ ਖਿਲਾਫ ਲੜਿਆ ਜਾਵੇਗਾ।

5. 5

   ਅੱਜ ਨਸ਼ੇ ਨਾਲ ਪੇਂਡੂ ਗਰੀਬ ਦਲਿਤ ਅਤੇ ਸ਼ਹਿਰੀ ਗਰੀਬ ਹਿੰਦੂ ਪਰਿਵਾਰਾਂ ਦੀ ਨਸਲਕੁਸ਼ੀ ਸਿਖਰਾਂ ‘ਤੇ ਹੈ। ਕੁਝ ਸਾਲ ਪਹਿਲਾਂ ਤਕ ਨਸ਼ਿਆਂ ਦੇ ਗਲਬੇ ਵਿਚ ਸਿਰਫ ਸਿੱਖ ਕਿਸਾਨੀ ਸੀ। ਅਸੀਂ ਪੰਜਾਬ ਦੇ ਹਰ ਮਾਈ ਭਾਈ ਨੂੰ ਸੁਚੇਤ ਕਰਾਂਗੇ ਕਿ ਇਹ ਲੜਾਈ ਸਿਰਫ ਸਿੱਖਾਂ ਦੀ ਜਾਂ ਕਿਸਾਨਾਂ ਦੀ ਨਹੀਂ।

6. 6

   ਨਸ਼ੇ ਕਰਕੇ ਹੀ ਲੁੱਟ ਖੋਹ, ਬਜਾਰਾਂ ਤੇ ਖੇਤਾਂ ਵਿਚੋਂ ਚੋਰੀਆਂ ਚਕਾਰੀਆਂ ਹੁੰਦੀਆਂ ਹਨ। ਇੱਥੋਂ ਤੱਕ ਕਿ ਫਿਰੌਤੀਆਂ ਮੰਗਣ ਵਾਲਿਆਂ ਨੂੰ ਸਥਾਨਕ ਗੁਰਗੇ ਵੀ ਨਸ਼ੇ ਕਰਨ ਵਾਲਿਆਂ ‘ਚੋਂ ਹੀ ਮਿਲਦੇ ਹਨ। ਇਹ ਉਹ ਲੋਕ ਹੁੰਦੇ ਹਨ ਜਿੰਨਾ ਦਾ ਇੱਕ ਹੀ ਨਿਸ਼ਾਨ ਹੁੰਦਾ ਕਿ ਨਸ਼ੇ ਦੀ ਅਗਲ਼ੀ ਡੋਜ ਲੈਣਾ। ਜਦੋਂ ਨਸ਼ਾ ਕਾਬੂ ਆਵੇਗਾ ਤਾਂ ਜੁਰਮ ਦੀਆਂ ਘਟਨਾਵਾਂ ‘ਚ ਆਪਣੇ ਆਪ ਵੱਡੀ ਕਮੀ ਆ ਜਾਵੇਗੀ।

7. 7

   ਨੌਜਵਾਨਾਂ ਨੂੰ ਚੰਗੇ ਰੁਜਗਾਰ ਦੇ ਮੌਕੇ ਦੇਣ ਦਾ ਹਲਫ ਅਗਲੇ ਡਾਕੂਮੈਂਟ ਵਿਚ ਕੀਤਾ ਜਾਵੇਗਾ, ਜਿਸ ਦਾ ਨਿਸ਼ਾਨਾ ਵੀ ਨੌਜਵਾਨੀ ਨੂੰ ਨਸ਼ਿਆਂ ਤੋਂ ਬਾਹਰ ਕੱਢਣਾ ਹੈ।

ਸਾਡਾ ਪਹਿਲਾ ਤੇ ਅੰਤਮ ਭਰੋਸਾ ਗੁਰੂ ਤੇ ਹੈ, ਇਹ ਪੰਜਾਬ ਗੁਰੂ ਦੇ ਨਾਂ ਤੇ ਵਸਦਾ ਹੈ, ਉਸ ਨੂੰ ਆਪਣੇ ਪੰਥ ਪੰਜਾਬ ਦੀ ਫਿਕਰ ਹੈ , ਅਸੀਂ ਸਭ ਨੂੰ ਗੁਰੂ ਦੇ ਹੁਕਮ ਤੇ ਭਾਣੇ ਵਿਚ ਆਉਂਣ ਦਾ ਹੋਕਾ ਦੇਵਾਂਗੇ। ਗੁਰੂ ਆਪ ਬਹੁੜੀ ਕਰੇਗਾ ਤੇ ਪੰਜਾਬ ਨੂੰ ਇਸ ਰੋਗ ਤੋਂ ਮੁਕਤ ਕਰੇਗਾ।